Bonnie Charlie's now awa',
Safely owre the friendly main;
Mony a heart will break in twa,
Should he ne'er come back again.
Will ye no come back again?
Will ye no come back again?
Better lo'ed ye canna be,
Will ye no come back again?

Ye trusted in your Hieland men,
They trusted you, dear Charlie;
They kent you hiding in the glen,
Your cleadin' was but barely.
Will ye no, &c.

English bribes were a' in vain,
An' e'en tho' puirer we may be;
Siller canna buy the heart
That beats aye for thine and thee.
Will ye no, &c.

We watched thee in the gloamin' hour,
We watched thee in the mornin' grey;
Tho' thirty thousand pounds they'd gi'e,
Oh there was nane that wad betray.
Will ye no, &c.

Sweet's the laverock's note and lang,
Lilting wildly up the glen;
But aye to me he sings ae sang, —
Will ye no come back again?
Will ye no come back again?
Will ye no come back again?
Better lo'ed ye canna be,
Will ye no come back again?