As I was walking all alane
Between a water and a wa';
And there I spied a wee wee man
And he was the least that ere I saw.

His legs were scarce a shathmont's length
And thick and thimber was his thigh,
Between his brows there was a span
And between his shoulders there was three.

He took up a meikle stane
And he flang 't as far as I could see;
Tho I had been as Wallace wight
I couldna liften it to my knee.

"O wee wee man but thou be strong,
O tell me whare thy dwelling be';
"My dwelling's down at yon bonny bower
O will you go with me and see?'

On we lap and awa we rade
Till we came to yon bonny green;
We lighted down for to bait our horse
And out there came a lady fine;

Four and twenty at her back
And they were a' clad out in green;
Tho the King of Scotland had been there
The warst o' them might hae been his Queen.

On we lap and awa we rade
Till we cam to yon bonny ha'
Whare the roof was o' the beaten gold
And the floor was o' the cristal a'.

When we came to the stair foot
Ladies were dancing jimp and sma',
But in the twinkling of an eye
My wee wee man was clean awa'.