The wee, wee flower, the wee, wee flower,
Shrinks frae the droukin' midnight shower,
But opes its leaves in sunny hour,
Slee type o' life, the wee, wee flower.

The wee, wee flower begins to blaw
When early draps o' spring-dews fa';
But snell Aprile aft gaurs it cower,
And nips in bud the wee, wee flower.

When elfin fairies trip the green,
Wi' dew-blobs glintin' in their een,
They lay them doun a' happit ower,
An' nestle in the wee, wee flower.

The wee flower decks nae garden gay,
But blooms in slee neuks far away;
It canna thole ae wanton glower,
Sae bashfu' is the wee, wee flower.

'Neath trees the wee flower rears its stem,
An' keps the draps that fa' frae them;
Yet a' it taks ne'er stints their power,
It lives on love, the wee, wee flower.

But, nither'd by the norlan' breeze,
The wee, wee flower aft dwines an' dees,
As Passion plucks frae Nature's bower,
And leaves to dee, the wee, wee flower.