Stout Laird o' Blackford Hill, let me
But gain your honour's lug a wee,
I fain wad let your lairdship see
Sufficient cause
To mak your hill to a' as free
As ance it was.

Weel mind I o' the joyous days
I gathered hips, an' haws, an' slaes,
Climbing ower Blackford's heathy braes
Birds' nests to herry,
Or smearing face, an' hands, an' claes,
Wi' bramble berry.

Or stealing forth, a truant bairn,
Amang Braid's shady woods to dern,
Pu'ing the bell and lady fern
That fringed the burn;
What holy lessons did I learn
At ilka turn!

Frae Blackford's summit wad I gaze
Ower hills an' valleys, glens an' braes,
The sun in ae unbroken blaze
Lichtin' the Forth,
And crowning Edin wi' bricht rays,
Queen o' the North.

Those beauteous scenes are ne'er forgot,
They licht with joy life's chequer'd lot,
And Braid's sweet burnie, glen, an' grot,
And Blackford brae,
Are bless'd by mony a wandering Scot
Far, far away.

Then shall a laird whase kindly heart
Has ever ta'en the puir man's part,
Be reckon'd like some mean upstart,
O' saulless stature,
Wha sells, as at an auction mart,
The face o' nature?

Though bairns may pu', when yap or drouthy,
A neep or bean, to taste their mouthy,
Losh, man! their hames are no sae couthy
As your bien Ha';
Though puir folks' bairns are unco toothie,
Their feeding 's sma'.

An' a' the neeps, an' a' the beans,
The hips, the haws, the slaes, the geens,
That e'er were pu'ed by hungry weans,
Could ne'er be missed
By lairds like you, wi' ample means
In bank and kist.

Then listen to my earnest prayer,
An' open Blackford Hill ance mair;
Let us a' pree the caller air
That sweeps its braes,
An' mak it worth the poet's care
To sing your praise.