The sun had clos'd the winter-day,
The Curlers quat their roaring play,
And hunger'd Maukin taen her way
To kail-yards green,
While faithless snaws ilk step betray
Whare she has been.

The Thresher's weary flingin-tree,
The lee-lang day had tir'd me;
And when the Day had clos'd his e'e,
Far i' the West,
Ben i' the Spence, right pensivelie,
I gaed to rest.

There, lanely, by the ingle-cheek,
I sat and ey'd the spewing reek,
That fill'd, wi' hoast-provoking smeek,
The auld, clay biggin;
And heard the restless rattons squeak
About the riggin.

All in this mottie, misty clime,
I backward mus'd on wasted time,
How I had spent my youthfu' prime
An' done nae-thing,
But stringing blethers up in rhyme
For fools to sing.

Had I to guid advice but harket,
I might, by this, hae led a market,
Or strutted in a Bank and clarket
My Cast-Account;
While here, half-mad, half-fed, half-sarket,
Is a' th' amount.

I started, mutt'ring blockhead! coof!
And heav'd on high my wauket loof,
To swear by a' yon starry roof,
Or some rash aith,
That I, henceforth, would be rhyme-proof
Till my last breath—

When click! the string the snick did draw;
And jee! the door gaed to the wa';
And by my ingle-lowe I saw,
Now bleezan bright,
A tight, outlandish Hizzie braw,
Come full in sight.

Ye need na doubt, I held my whisht;
The infant aith, half-form'd, was crusht;
I glowr'd as eerie's I'd been dusht,
In some wild glen;
When sweet, like modest Worth, she blusht,
And stepped ben.

Green, slender, leaf-clad Hollyboughs
Were twisted, gracefu', round her brows,
I took her for some S COTTISH Muse
By that same token;
And come to stop those reckless vows,
Would soon been broken.

A ‘hare-brain'd, sentimental trace’
Was strongly marked in her face;
A wildly-witty, rustic grace
Shone full upon her;
Her eye, ev'n turned on empty space,
Beam'd keen with Honor.

Down flow'd her robe, a tartan sheen,
Till half a leg was scrimply seen;
And such a leg! my B ESS , I ween,
Could only peer it;
Sae straught, sae taper, tight and clean,
Nane else came near it.

Her Mantle large, of greenish hue,
My gazing wonder chiefly drew;
Deep lights and shades, bold-mingling, threw
A lustre grand;
And seem'd, to my astonish'd view,
A well-known Land.

Here, rivers in the sea were lost;
There, mountains to the skies were tost:
Here, tumbling billows mark'd the coast,
With surging foam;
There, distant shone, Art's lofty boast,
The lordly dome.

Here, D OON pour'd down his far-fetch'd floods;
There, well-fed I RWINE stately thuds:
Auld hermit A IRE staw thro' his woods,
On to the shore;
And many a lesser torrent scuds,
With seeming roar.

Low, in a sandy valley spread,
An ancient B OROUGH rear'd her head;
Still, as in Scottish Story read,
She boasts a Race,
To ev'ry nobler virtue bred,
And polish'd grace.