1

In vice most vicius he excellis
That with the vice of tressone mellis.
Thocht he remissioun
Haif for prodissioun,
Schame and susspissioun
Ay with him dwellis.

2

And he evir odious as ane owle,
The falt sa filthy is and fowle:
Horrible to natour
Is ane tratour,
As feind in fratour
Vndir a cowle.

3

Quha is a tratour or ane theif,
Vpoun him selff turnis the mischeif.
His frawdfull wylis
Him self begylis,
As in the Ilis
Is now a preiff.

4

The fell strong tratour, Donald Owyr,
Mair falsett hes nor vdir fowyr,
Round ylis and seyis
In his suppleis,
On gallow treis
Now he dois glowir.

5

Falsett no feit hes nor deffence,
Be power, practik nor puscence.
Thocht it fra licht
Be smord with slicht,
God schawis the richt
With soir vengence.

6

Off the fals fox dissimvlatour
Kynd hes all reffar, theiff and tratour:
Eftir respyt
To wirk dispyt
Moir appetyt
He hes of natour.

7

War the fox tane a thowsand fawd
And grace him gevin als oft for frawd,
War he on plane,
All war in vane,
Frome hennis agane
Micht non him hawd.

8

The murtherer ay mvrthour mais,
And evir quhill he be slane he slais.
Wyvis thus makis mokkis,
Spynnand on rokkis:
Ay rynnis the fox
Quhill he fute hais.