घट तिचा रिकामा झऱ्यावरी
त्या चुंबिती नाचुनी जललहरी

अशी कशी ही जादू घडली
बघता बघता कशी हरपली
त्या समजुनिया राणी अपुली
तिज उचलुनी नेई कुणी तरी

मिळत चालल्या तीन्ही सांजा
दिवसाचा हा धूसर राजा
चंद्रा सोपुनि आपुल्या काजा
घे निरोप कवळुनी जगा करी

पलिकडे त्या करुनि कापणी
बसल्या बाया हुश्श करोनि
विनोद करिती रमती हसुनी
जा पहा तिथे कुणी ही भ्रमरी

तिथे वडाच्या पाळीभवती
नवसास्तव मृगनयना जमती
कुजबुजुनी गुजगोष्टी करिती
रतिमंजिरी हेरा तिथे तरी

पलीकडे वेळुंची जाळी
तेथे वारा धुडगुस घाली
शीळ गोड ती कुठुनि निघाली
ही झुळुक हरपली लकेरिपरी

तांदुळ पदरी बिल्वदल करी
चरण घालुनी जवळ तळ्यावरी
जमति शिवालयि पोक्त सुंदरी
हिरकणी बघा ही त्यात तरी