Me dois-je taire encor Amour, quelle apparence?
Jamais esprit ne fut force comme le mien:
Il faut ou denouir, ou rompre ce lien,
Et d'un dernier effort tanter ma delivrance.

Trop de discretion nuit a mon esperance:
Enfin je veux sçavoir, ou mon mal, ou mon bien,
Et quiter ce respect qui ne sert plus de rien,
Que d'un sot exercice a ma perseverance.

Mon amour ne veut plus servir si laschement,
Elle ostera bien tost ce foible empeschement,
Rien plus ne me sçauroit obliger a me taire:
Phillis se rit d'un mal qu'elle me voit celer,
Et me juge un enfant qui ne sçauroit rien faire,
Puis que comme un enfant je ne sçaurois parler.