I winna hae a lawyer loun, wi' glib an' sleekit mou',
Wha gaurs the wrang appear the richt, gin bribed by muckle fee,
Wha plays at fast an' loose alike baith wi' the fause and true,
Nae twa-faced whomlin' whirligig shall ever wheedle me.

I winna hae the merchant chiel, wha's wealth is a' his pride,
Wi' treasures piled in ilka land, an' ships on ilka sea;
E'en let him woo Dame Fortune, and her fickle humour bide,
Nae sordid son o' Mammon e'er shall win a heart frae me.

I winna hae a loutish laird, wha talks o' wheat an' bear,
And brags o' acres stretchin' far ower mountain, muir, and lee;
Wha hoards kind Nature's gowden stores to keep the markets dear,
Nae wretch wha stints the puir man's caup need e'er seek grace frae me.

But gin a sodger, young an' brave, wha guards his country's weal,
Wi' patriot ardour in his heart, an' daurin' in his ee,
Should ever seek to win my heart, wi' purpose true an' leal,
How dear the thought, that sic a heart should hae a neuk for me!