1

Rorate, celi, desuper!
Hevins, distill your balmy schouris,
For now is rissin the brycht day ster
Fro the ros Mary, flour of flouris.
The cleir sone quhome no clud devouris,
Surminting Phebus in the est,
Is cumin of his hevinly touris,
Et nobis puer natus est.

2

Archangellis, angellis and dompnationis,
Tronis, potestatis and marteiris seir,
And all ye hevinly operationis,
Ster, planeit, firmament and speir,
Fyre, erd, air and watter cleir,
To him gife loving, most and lest,
That come in to so meik maneir
Et nobis puer natus est.

3

Synnaris, be glaid and pennance do
And thank your makar hairtfully,
For he that ye mycht nocht cum to
To yow is cumin full humly,
Your saulis with his blud to by
And lous yow of the feindis arrest,
And only of his awin mercy,
Pro nobis puer natus est.

4

All clergy, do to him inclyne
And bow vnto that barne benyng,
And do your obseruance devyne
To him that is of kingis king.
Ensence his altar, reid and sing
In haly kirk with mynd degest,
Him honouring attour all thing,
Qui nobis puer natus est.

5

Celestiall fowlis in the are,
Sing with your nottis vpoun hicht,
In firthis and in forrestis fair
Be myrthfull now at all your mycht,
For passit is your dully nycht.
Aurora hes the cluddis perst,
The son is rissin with glaidsum lycht
Et nobis puer natus est.

6

Now spring vp, flouris, fra the rute,
Reuert yow vpwart naturaly,
In honour of the blissit frute
That rais vp fro the rose Mary.
Lay out your levis lustely,
Fro deid tak lyfe now at the lest,
In wirschip of that prince wirthy,
Qui nobis puer natus est.

7

Syng, hevin imperiall most of hicht,
Regions of air, mak armony.
All fische in flud and foull of flicht,
Be myrthfull and mak melody.
All, gloria in excelsis cry,
Hevin, erd, se, man, bird and best.
He that is crownit abone the sky,
Pro nobis puer natus est.