Classic Poem

Quant Theseus, Herculès et Jason
Cercherent tout, et terre et mer parfonde,
Pour acroistre leur pris et leur renom
Et pour veoir bien tout l'estat dou monde,
Moult furent dignes d'onnour.
Mais quant voy de biauté l'umble flour,
Assevis sui de tout, si que, par m'ame,
Je voy assez, puis que je voy ma dame.

Car en veant sa biauté, sa façon
Et son maintieng qui de douceur seuronde,
J'y preng assez bien pour devenir bon,
Car le grant bien de li en moy redonde
Par grace de fine amour
Qui me contraint a haïr deshonnour
Et tout vice; si puis dire sanz blame:
Je voy assez, puis que je voy ma dame.

Veoir ne quier la dorée toison
Ne les Yndes ne de Rouge Mer onde,
N'aus infernaus penre guerre ou tençon
Pour eslongier le regart de la blonde
Dont me vient joye et baudour
Et doulz penser; si tieng pour le millour
Qu', à tout conter et bien peser à drame,
Je voy assez, puis que je voy ma dame.