My young cousin Peggy cam doun frae Dunkeld,
Wi' nae word o' lawlants ava man,
But her blue speakin' een a' her kind meanin' tauld,
An' her brow shone as white as the snaw man;
She cam here to sheer, and she stay'd here to spin,
She wrought wi' the fremit, an' lived wi' her kin,
She laid naething out, but she laid muckle in,
An' she fended on naething ava, man.

An' wow but the lassie was pawky an' slee,
For she smiled an' she smirkit till a', man,
Growing a' body's bodie, baith muckle an' wee,
An' our folk wadna let her awa, man.
For when there was trouble or death in the house,
She tended the sick-bed as quiet as a mouse,
An' wrought three folks' wark aye sae canny an' douce,
Ye wad thought she did naething ava, man.

She grew rich in beauty, she grew rich in gear,
She learnt to speak lawlants an' a', man;
Her wit it was keen, and her head it was clear,
My sang! she was match for us a', man.
She was trysted to suppers, inveetit to teas,
Gat mony braw presents, an' mony gowd fees,
An' e'en my ain Billies sae kittle to please,
She tickled the hearts o' them a', man.

But the sweet Hieland lassie, sae gentle and meek,
Refused them for gude an' for a', man,
Aye gaun to the auld Hielan' kirk ilka week,
While the minister aft gae a ca', man.
O his was the fervour, and hers was the grace,
They whisper'd sweet Gaelic, he gazed in her face,
Like licht, true love travels at nae laggin' pace—
She's the star o' his heart an' his ha', man.