There's nane may ever guess or trow my bonnie lassie's name,
There's nane may ken the humble cot my lassie ca's her hame;
Yet tho' my lassie's nameless, an' her kin o' low degree,
Her heart is warm, her thochts are pure, an' O! she's dear to me;

She's gentle as she's bonnie, an' she's modest as she's fair,
Her virtues, like her beauties, a', are varied as they're rare;
While she is light an' merry as the lammie on the lea,
For happiness an' innocence thegither aye maun be!

Whene'er she shews her blooming face the flowers may cease to blaw,
An' when she opes her hinnied lips, the air is music a';
But when wi' ither's sorrows touched, the tear starts to her ee,
Oh! that's the gem in beauty's crown, the priceless pearl to me.

Within my soul her form's enshrined, her heart is a' my ain,
An' richer prize, or purer bliss, nae mortal e'er can gain;
The darkest paths o' life I tread wi' steps o' bounding glee,
Cheered onward by the love that lichts my nameless lassie's ee!