My hairt is heich aboif, my body is full of blis,
For I am sett in lufe als weill as I wald wis.
I lufe my lady pure and scho luvis me agane;
I am hir serviture, scho is my soverane;
Scho is my verry harte, I am hir howp and heill;
Scho is my joy inwart, I am hir luvar leill;
I am hir bound and thrall, scho is at my command;
I am perpetuall hir man both fute and hand.
The thing that may hir pleis, my body sall fulfill;
Quhatevir hir diseis, it dois my body ill.
My bird, my bony ane, my tendir bab venust,
My lufe, my lyfe allane, my liking and my lust,
We interchange our hairtis in utheris armis soft;
Spreitles we twa depairtis, usand our luvis oft.
We murne quhen licht day dawis; we plene the nycht is schort;
We curs the cok that crawis that hinderis our disport.
I glowffin up agast quhen I hir mys on nycht,
And in my oxster fast I find the bowster richt.
Than langour on me lyis, lyk Morpheus, the mair,
Quhilk causis me uprys and to my sweit repair,
And than is all the sorrow furth of remembrance,
That evir I had a forrow in luvis observance.
Thus nevir I do rest, so lusty a lyfe I leid
Quhen that I list to test the well of womanheid.
Luvaris in pane, I pray God send you sic remeid
As I haif nycht and day, you to defend frome deid.
Thairfoir be evir trew unto your ladeis fre,
And thay will on you rew, as mine hes done one me.