Beneath a green shade I fand a fair maid
Was sleeping sound and still-O,
A' lowing wi' love, my fancy did rove
Around her with good will-O:
Her bosom I press'd, but, sunk in her rest,
She stir'd na my joy to spill-O:
While kindly she slept, close to her I crept,
And kiss'd, and kiss'd her my fill-O.

Oblig'd by command in Flanders to land,
T' employ my courage and skill-O,
Frae 'er quietly I staw, hois'd sails and awa,
For wind blew fair on the hill-O.
Twa years brought me hame, where loud-frasing fame
Tald me with a voice right shrill-O,
My lass, like a fool, had mounted the stool,
Nor kend wha 'd done her the ill-O.

Mair fond of her charms, with my son in her arms,
I ferlying speer'd how she fell-O:
Wi' the tear in her eye, quoth she, Let me die,
Sweet Sir, gin I can tell-O.
Love gae the command, I took her by the hand,
And bad her a' fears expel-O,
And nae mair look wan, for I was the man
Wha had done her the deed mysell-O.

My bonny sweet lass, on the gowany grass,
Beneath the Shilling-hill-O;
If I did offence, I 'se make ye amends,
Before I leave Peggy's mill-O.
O! the mill, mill-O, and the kill, kill-O,
And the cogging of the wheel-O,
The sack and the sieve, a' thae ye man leave,
And round with a soger reel-O.