1

Madam, your men said thai wald ryd
And latt this Fasterennis Ewin ower slyd,
Bott than thair wyffis cam furth in flockis
And baid tham betteis som abyd
Att haem and lib tham of the pockis.

2

Nou propois thai, sen ye dwell still,
Off Wenus feest to fang an fill,
Bott in the fedle preiff thai na cockis.
For till heff riddin hed bein les ill,
Nor latt thair wyffis breid the pockis.

3

Sum of your men sic curage hed,
Dam Venus fyre sa hard tham sted,
Thai brak vp durris and raeff vp lockis,
To get an pamphelet on a pled,
That thai mycht lib tham of the pockis.

4

Sum that war ryatous as rammis
Ar nou maid tame lyk ony lammis,
And settin down lyk sarye crockis,
And hes forsaekin all sic gammis
That men callis libbin of the pockis.

5

Sum, thocht tham selffis stark lyk gyandis,
Ar nou maid waek lyk willing wandis,
With schinnis scharp and small lyk rockis,
And gottin thair bak in bayth thair handis,
For ower offt libbin of the pockis.

6

I saw coclinkis me besyd
The young men to thair howses gyd,
Had bettir lugget in the stockis.
Sum fra the bordell wald nocht byd
Quhill that thai gatt the Spanyie pockis.

7

Thairfoir all young men, I you pray,
Keip you fra harlottis nycht and day
(Thai sall repent quhai with tham yockis)
And be war with that perrellous play
That men callis libbin of the pockis.