The lasses yet! the lasses yet!
Rise up, ye loons — ye durna sit —
Around me join ilk voice to mine —
The lasses yet! the lasses yet!

Though some may geck at womankind,
And slight them sair to shaw their wit —
Their loving subjects leal are we: —
The lasses yet! the lasses yet!
Chorus — The lasses yet! the lasses yet! &c.

Their kindly and their lovesome ways
To them ilk manly heart should knit:
The flowers o' earth an' joys o' life —
The lasses yet! the lasses yet!
Chorus — The lasses yet! the lasses yet! &c.

We dinna like a weary wind
That ever in ae airt doth sit:
They change, an' changes lightsome are; —
The lasses yet! the lasses yet!
Chorus — The lasses yet! the lasses yet! &c.

Wha on the earth ha'e warmest hearts?
Wha welcome first the stranger fits?
Who bless our youth an' cheer our age? —
The lasses yet! the lasses yet!
Chorus — The lasses yet! the lasses yet! &c.

They're kindly, frae the grannie auld,
That crooning in the neuk doth sit,
To laughing gilpies herding kye —
The lasses yet! the lasses yet!
Chorus — The lasses yet! the lasses yet! &c.

The lift is sweet in summer rain,
And when the sun its arch doth light;
And sweet are they in smiles or tears —
The lasses yet! the lasses yet!
Chorus — The lasses yet! the lasses yet! &c.

Auld gabbin' gray-beards please at morn;
And rantin' chields when yill we get;
But, ance and aye, the dearies charm; —
The lasses yet! the lasses yet!
Chorus — The lasses yet! the lasses yet! &c.

Camsteerie they at times may be;
But louring clouds will quickly flit:
The warmest sun comes after shade —
The lasses yet! the lasses yet!
Chorus — The lasses yet! the lasses yet! &c.

The lasses! frae the jewell'd queen
To rosy dears, in ha' and hut, —
The lasses! here and everywhere —
The lasses yet! the lasses yet!
Chorus — The lasses yet! the lasses yet!
Rise up, ye loons — ye daurna sit —
Around me join ilk voice to mine —
The lasses yet! the lasses yet!