Kilt thy coat Maggy, Maggy, dear Maggy,
Kilt thy coat Maggy, and dance thou wi' me;
Thy white genty feetie scarce bends the wee gowan,
An' a' thy licht motions are gracefu' an' free.

Ope thy mou' Maggy, Maggy, dear Maggy,
Ope thy mou' Maggy, and lilt thou to me;
Thy voice is as saft as the hill burnie rowin',
An' sweet as the lintie that sings on the tree.

Lend thine ear Maggy, Maggy, dear Maggy,
Lend thine ear Maggy, and listen to me,
Sae meek and sae modest, sae bashfu' an' bonny,
My saul's dearest wishes a' centre in thee!

Name the day Maggy, Maggy, dear Maggy,
Name the day Maggy, our bridal may be;
For hours they seem towmonds, an' days they seem ages,
Till I hae my Maggy, and Maggy has me.