Classic Poem

I winna say your mou', lass,
Is bonnier than the rose;
But this I will avow, lass,
Tae ilka floo'er that blows,
Until I saw your mou', lass,
I never kenned richt true, lass,
Hoo bonnie is the rose.

I winna say your een, dear,
Are bluer than the sky;
But mony a time I've seen, dear,
The cloodless lift on high,
Yet till I saw your een, dear,
I ken I ne'er had seen, dear,
The licht in the blue sky.

I winna say your hair, Jean,
Is duskier than the nicht,
Or the twa een shinin' rare, Jean,
Ootshine the clear starlicht;
But 'twas your een an' hair, Jean,
Tellt me hoo fair an rare, Jean,
Can be a starry nicht.

I winna say your heart, love,
Is whiter than the snaw,
Swirlin' frae ilka airt, love,
On a' the win's that blaw;
Yet aye I think o' your heart, love,
Whan snaw lies ilka airt, love,
White as the day does daw.

I winna say your heart, love,
Is warmer than the flame,
Whan ane frae some cauld airt, love,
Weary an' wat comes hame;
But 'tis the lowe in your heart, love,
That, warmin' ilka pairt, love,
Maks bricht the ingle flame.