M ARTYRES olim validi,
Fratresque vos Wiccamici!
Coelicolae qui vivitis,
Orate pro Wiccamicis.

Per Fundatoris insciam
Oblivii memoriam:
Date preces pro fratribus,
Ne confundamur ocius.

Saevior vobis erat mors:
At vitae immortalis sors
Vos inter choros posuit,
Quos Deus ipse reficit.

Deliciis fruimini:
Nunc igitur propitii
In valle laborantibus,
Fundite lumen clarius.

Quid valet furor Gentium?
Cohortes Immortalium
Draconis vincent copias:
Nunquam labavit Veritas.

Et iuventutis memores
Delectat vos secura spes:
Augebitur vis Fidei
Ad voluntatem Wiccami.

Quam dulce nomen consonat
Domus! Et nostra superat
Domus terrestres caeteras:
O domus dulcis! floreas.

Quae pariter amavimus:
Mons Catharinae pedibus
Vestris erat amabilis;
Lapsusque Ichini gracilis.

Vobisque cara claustra sunt,
Sacro quae cantu perstrepunt:
Et coluistis mortuos
Antiquitus Wiccamicos.

Vos autem non Wiccamica,
Sed Urbs coelorum mystica
Perpetuos amplectitur
Cives: et vox exoritur:

Vox Angelorum carmine
Qui Sion stant in limine:
Vos circum adorantes stant,
Et triumphantes celebrant.

Quantus nam ignis vere vos
Fons testabatur aureos!
Quanta nox mortis animas
Inveniebat lucidas!

Per Crucifixi Sanguinem,
Per vitam Matris humilem:
Monstrate Matris gloriam,
Et Crucifixi regiam.

Maria! nonne Mater es?
Filios audi supplices:
Misericors in miseros,
Pacis ad vias trahe nos!

Agimus tibi gratias,
Salus et Lux! gratissimas:
Quae Domum tui nominis
Amore tuo protegis.

Antiquas super ianuas
Etiamnum veneranda stas:
Tuis tui vae! nesciis
Arx et coelorum Porta sis.