TUNE — " THE BONNY LASS OF BRANKSOME. "

As I came in by Tiviot side,
And by the braes of Branksome,
There first I saw my bonny bride,
Young, smiling, sweet, and handsome:
Her skin was safter than the down,
And white as alabaster;
Her hair a shining wavy brown;
In straightness nane surpast her.

Life glow'd upon her lip and cheek,
Her clear een were surprising,
And beautifully turn'd her neck,
Her little breasts just rising:
Nae silken hose with gushets fine,
Or shoon with glancing laces,
On her fair leg forbad to shine,
Well shapen native graces.

Ae little coat, and bodice white,
Was sum of a' her claithing; —
Even these o'er mickle; — mair delyte
She 'd given cled wi' naithing.
She lean'd upon a flow'ry brae,
By which a burnie trotted;
On her I glowr'd my saul away,
While on her sweets I doated.

A thousand beauties of desert
Before had scarce alarm'd me,
Till this dear artless struck my heart,
And but designing, charm'd me.
Hurry'd by love, close to my breast
I grasp'd this fund of blisses;
Wha smil'd, and said, without a priest,
Sir, hope for nought but kisses.

I had nae heart to do her harm,
And yet I couldna want her;
What she demanded, ilka charm
Of her's pled, I should grant her.
Since heaven had dealt to me a routh,
Straight to the kirk I led her,
There plighted her my faith and troth,
And a young lady made her.