Classic Poem

Where windin' Tarf, by broomy knowes,
Wi' siller waves to sa't sea rows;
An' mony a green-wood cluster grows,
An' hare-bells bloomin' bonnie, O.
Below a spreadin' hazle lee,
Fu' snugly hid whar nane cou'd see,
While blinkin' love beam'd frae her e'e,
I met my bonnie Annie, O.

Her neck was o' the snaw-drap hue,
Her lips like roses wet wi' dew;
But O, her e'e, o' azure blue,
Was past expressin' bonnie, O.
Like threads o' gowd her flowin' hair,
That lightly wanton'd wi' the air;
But vain were a' my rhymin' ware
To tell the charms o' Annie, O.

While smilin' in my arms she lay,
She, whisperin', in my ear did say,
“O how could I survive the day,
Should ye prove false, my Tammie, O?”
“While spangl'd fish glide to the main,
While Scotlan's braes shall wave wi' grain,
Till this fond heart shall break wi' pain,
I'll ay be true to Annie, O.”

The Beltan winds blew loud an' lang,
An' ripplin' rais'd the spray alang;
We cheerfu' sat, an' cheerfu' sang,
The banks o' Tarf are bonnie, O.
Tho' sweet is spring, whan young an' gay,
An' blythe the blinks o' summer's day;
I fear nae winter cauld an' blae,
If blest wi' love an' Annie, O.