Alas! that I cam ower the muir,
And left my love behind me;
Alas! that ane sae fair and pure,
For ever couldna bind me.
I wander there, I wander here,
Yet dowie thoughts remind me
O' her sad look and silent tear,
When I left her behind me.
But I'll my truant steps retrace,
Ance mair I'll see her peerless face,
Her gentle breast may deign me grace,
Though I left her behind me.

What though I own a broad domain,
Ower mony miles extending,
And her auld sire a humble swain,
Wha barely maks a fending!
What low debasing wealth was mine,
Wi' earth that had entwined me,
And gaured me leave ane a' divine,
Alane to mourn behind me.
But I'll re-cross that eerie plain,
Her virgin heart is still my ain,
I'll own my faut and ne'er again
Will leave my love behind me.