Classic Poem

I

I ken a bonnie burn
Gaes wimplin' 'mang the fern,
A-croonin' tae itsel' its wee bit sang;
An' whiles it rins an' laughs,
An' whiles whirls roon' an' daffs,
An' there a' day I daunder, an' ne'er think lang.

It winds ma hame a' roon',
Aneath the sun an' moon,
A threid o' gowd an' siller thro' the grass;
An' owre the sunny lea
Whaur birdies sing an' flee,
Ane watches owre the sea the lichts an' shadows pass.

II

But whiles a thocht I tak'
Frae the laigh fields tae brak',
An' see the hielan' glen it swirls doon;
An' then it grows austere
Wi' a wee touch o' fear:
Mysterious things ootpeer frae rocks an' waters broon.

The trees mair awfu' nod,
An' the great hills o' God
Watch ye, an' wonder hoo ye daur tae come;
The sky grows strange aboon,
The sea grows strange faur doon,
The glen grows strange a' roon', an' a' the heart is dumb.

III

A sough gaes thro' the wood;
The shadow o' a clood
Maks solemn a' the silence o' the glen;
I daurna faurer gae
Tae see whaur it comes frae:
I turn ma steps in haste back tae the hames o' men.

Somewhaur 'mang God's ain hills
Whaur His ain dew distils,
Sleeps a wee silent loch, still as the glassy sea,
There first the sun looks roon',
There come the stars an' moon,
An' His ain Face looks doon in love's ain mystery!