Classic Poem

The well of vertew and flour of womanheid.
And patrone unto patiens,
Lady of lawty baith in word and deid,
Rycht sobir sweit, full meik of eloquens,
Bayth gud and fair, to your magnificens
I me commend, as I haif done befoir,
My sempill hairt for now and evir moir.

For evir moir I sall you service mak,
Syne of befoir in to my mynd I maid,
Sen first I knew your ladischip but lak,
Bewty, youth of womanheid ye had,
Withouttin rest my hairt cowth nocht evad;
Thus am I youris, and evir sensyne hes bene,
Commandit be your gudly twa fair ene.

Your twa fair ene makis me oft syis to sing;
Your twa fair ene makis me to syche also;
Your twa fair ene makis me grit conforting;
Your twa fair ene is wycht of all my wo;
Your twa fair ene, may no man keip thame fro
Withouttin rest that gettis a sycht of thame;
This of all vertew were ye now the name.

Ye beir the name of gentilnes of blud;
Ye beir the name that mony for you deis;
Ye beir the name ye ar bayth fair and gud;
Ye beir the name that faris than you seis;
Ye beir the name Fortoun and ye aggreis;
Ye beir the name of landis of lenth and breid,
The well of vertew and flour of womanheid.