Classic Poem

O, LASSIE , wilt thou gang wi' me,
An' leave thy frien's i' south countrie—
Thy former frien's an' sweethearts a',
An' gang wi' me to Gallowa'?

O Gallowa' braes, they wave wi' broom,
An' heatherbells in bonnie bloom;
There's lordly seats an' livin's braw
Amang the braes o' Gallowa'.

There's stately woods on mony a brae,
Where burns and birds in concert play;
The waukrife echo answers a',
Amang the braes o' Gallowa'.
O Gallowa' braes, they wave wi' broom, &c.

The simmer shiel' I'll build for thee
Alang the bonnie banks o' Dee,
Half circlin' roun' my father's ha',
Amang the braes o' Gallowa'.
O Gallowa' braes, they wave wi' broom, &c.

When Autumn waves her flowin' horn,
An' fields o' gowden grain are shorn,
I'll busk thee fine in pearlin's braw,
To join the dance in Gallowa'.
O Gallowa' braes, &c.

At e'en, whan darkness shrouds the sight,
An' lanely langsome is the night,
Wi' tentie care my pipes I'll thraw,
Play “A the way to Gallowa',”
O Gallowa' braes, &c.

Should fickle fortune on us frown,
Nae lack o' gear our love shou'd drown;
Content shou'd shield our haddin' sma',
Amang the braes o' Gallowa'.

Come, while the blossom's on the broom,
An' heather-bells sae bonny bloom;
Come, let us be the happiest twa
On a' the braes o' Gallowa'!